Hugleiðingar um olíuhreinsistöð á Vestfjörðum og um lélega afkomu möguleika fólks víða á landsbyggðinni

Formáli

 

Fyrsti apríl er í dag og þá skapast alltaf skemmtileg stemming um hvort fólk sé að gabba eða ekki. Hér er ekki um neitt gabb að ræða heldur alvara lífsins. Landsbyggðin þarf að rísa upp og berjast við Risana á Suðvesturhorninu fyrir auknum réttindum og ekki hvað síst Vestfirðingar.

 

Í morgunn barst mér grein frá Sverri Gíslasyni frá Heydal í Mjóafirði v/Djúp. Sverrir er fæddur í Reykjavík 1931. Hann flutti ásamt móður sinni til Ísafjarðar 1939. Þau dvöldu hjá Grími rakara föður Ólafs Ragnars núverandi forseta Íslands og síðar á Hjálpræðishernum. Þau ein fengu fyrir náð og miskunn ásamt gömlum manni að búa þar áfram eftir að breski herinn yfirtók Hjálpræðisherinn undir sína menn. Vegna heimstyrjaldarinnar var Sverrir sendur til dvalar í sveit sumarið 1940 sem kúasmali hjá hjónunum Elínusi Jóhannessyni og Þóru Runólfsdóttur í Heydal í Mjóafirði. Sverrir missti föður sinn þetta sama ár og móðir hans lést 2 árum seinna. Sverrir ílengdist í Heydal og tóku Elínus og Þóra að sér hlutverk fósturforelda. Því miður átti enn eftir að skarðast í þeim hópi sem stóðu Sverrir næst þegar Þóra fósturmóðir hans lést 1944. Þá stóðu þeir uppi einir, Elínus og Sverrir.

 

Sverrir flutti aftur á mölina 1952 og gerðist múrari  tveimur árum síðar. Sverrir er búsettur í dag ásamt eiginkonu sinni Ólafíu S.B. Bjarnadóttir  í Þykkvabæ í dag. Í 17 ár stundaði hann kartöflurækt en ekki hvað, búsettur í Kartöflubænum mikla?

 

Ég kynntist Sverri þegar hann var að skrifa bækur um Reykjafjarðarhrepp og Ögurhrepp sem eru innarlega við Ísafjarðardjúp. Bækurnar fjalla um lífsbaráttu fólksins á 20. öld og eru bækurnar prýddar mörgum myndum af fólkinu sem þarna var búsett og margar myndir segja sjálfar sögu fólksins þar sem þau eru að vinna við landbúnaðarstörf með handaflinu einu saman.

 

Fyrri bókin Fletta fjalla um gamla Reykjafjarðarhrepp síðastliðin 100 ár og er skreytt 370 ljósmyndum. Seinni bókin Gluggasteinn fjallar um Ögurhrepp og Reykjafjarðarhrepp og er skreytt 430 ljósmyndum.  Sverrir valdi tvo presta til að skrifa formála í bækurnar sínar, þá Séra Kristinn Á. Friðfinnsson og Séra Baldur Vilhelmsson sem er búsettur í Vatnsfirði ásamt eiginkonu sinni Ólafíu Salvarsdóttir sem er frænka mín.

Sverrir  opnað ljósmyndasýningu 17 ágúst  2003 í Reykjanesi v/Djúp. Þar er á að líta 400 myndir af fólkinu í gamla Reykjarfjarðarhrepp sem spannar yfir alla síðustu öld. Sýningin er enn opin og meiningin er að myndirnar verði þarna áfram.

 

Ef þú lesandi góður hefur áhuga að kaupa bækurnar þá er einfaldast að hringja í Sverrir í síma 4875631 eða 8481126.

 

Sverrir þekkti mjög vel móðurfjölskyldu mína sem bjó hinu megin við Heydalsá á Galtarhrygg og voru þau öll mjög góðir vinir. Hann heimsótti þau oft og það get ég vel skilið, því þar bjuggu fegurstu heimasæturnar  í sveitinni og þótt víðar væri leitað.

 

Damen skal  først men nu synes jag det er mandens tur.

Baráttukveðjur.

Rósa Aðalsteinsdóttir tilvonandi Sendiherra fyrir Frí-ríkið á Vestfjörðum.  

 

Hugleiðingar um olíuhreinsistöð á Vestfjörðum og um lélega afkomu möguleika fólks víða á landsbyggðinni

 

Það virðist sem áhugi á að reisa olíuhreinsistöð á Vestfjörðum hafi  eitthvað dvínað ef marka má hina miklu umræðu sem var í gangi á tímabili árið 2007. Þegar umræðan stóð sem hæst þá upphófst mikill áhugi á þessu risafyrirtæki. Sitt sýndist hverjum, þeir bjartsýnustu töldu að þetta væri bjargvætturinn og þetta væru þær aðgerðir sem færðu Vestfirðingum þann auð sem myndi duga peningalega. Kannski er þetta lognið á undan storminum? Ég vona að svo verði ekki og upp á borð ráðamanna komi eitthvað viturlegra og umhverfisvænna. Eitthvað sem ekki stafar hætta af eins og gæti t.d. gerst ef risaolíuflutningaskip færist við strendur Vestfjarða. Veðurfar hér á norðurslóð eru þau illvígustu í allri veröldinni og ölduhæð getur orðið allt að 20 - 30 m þegar mest gengur á og brotsjóir hættulegir. Þessi risaolíuflutningaskip geta tekið mikið á sig eins og sagt er í svona veðraham. Þau eru jafnvel ver búin í vond veður heldur en minni skip okkar Íslendinga eins og t.d. skuttogararnir. Nokkrum sinnum hér fyrr á árum heyrði maður í fréttum að þessi skip hefðu brotnað í tvo hluta og það sem einu sinni hefur gerst getur gerst aftur.

 

Nú hefur hópur bloggara, nokkur hundruð manns, tekið sig saman og ætla að stofna samtökin - Bloggarar bjarga Vestfjörðum - skammstöfun BBV. Ég myndi vilja benda sveitarstjórnarmönnum á Vestfjörðum að lesa blaðagrein  sem birtist í Morgunblaðinu miðvikudaginn 26. mars 2008. Höfundur greinarinnar er Jakob Kristinsson. Jakob er upprunninn á Vestfjörðum en býr í Sandgerði. Þetta er mjög athyglisverð lesning.  Það eru  vandamál víðar um land en á Vestfjörðum. Það er kvótaskerðing á þorski sem herjar á fólkið en einhverjar bætur fá sveitarfélögin frá ríkisvaldinu  Það er synd og skömm að fara svo með þessa fallegu perlu, eyjuna Ísland, hér norður við ysta haf. Það er sama hvaða stétt er, hvort það eru bændur eða sjómenn, allt er þetta skilið eftir í einhvers konar erfiðleikum. Ráðamenn þjóðarinnar verða að hafa í huga að þetta er dugmesta fólkið á landinu. Þetta er það fólk sem allt kann. Nú er svo komið að enginn maður getur hafið búskap í sveit út af dýru jarðarverði og okri. Sama er að segja um sjómennskuna. Þetta silfurtæra úthaf sem umlykur landið okkar, þetta haf sem hefur státað af bestu fiskimiðum heims. Hér er eitthvað mikið að. Stór hópur sjómanna með venjulega fiskibáta mega ekki fara á sjó og draga fisk. Þetta er þjóðarskömm, því þetta eru bátarnir sem koma með besta fiskinn og skapa landsbyggðarfólkinu atvinnu. Gríðarlegt peningaflóð lendir í Reykjavík og er þar í umferð. Fjöldinn allur af venjulegu fólki og þá á ég við fólk sem þarf að vinna á sínar tvær hendur veit ekki sitt rjúkandi ráð og berst af hörku við að komast af í þessari Reykjavíkur hít, þar sem leiga á smá íbúðarkompu getur verið allt að hundrað þúsund krónur á mánuði. Peningar að láni eru brjálæðislega dýrir - já þeir eru eitt í dag og annað á morgun. Bankarnir tútna út sem aldrei fyrr og við hlið þeirra eru peningamennirnir sem vart sofa vegna þess að þeir eru svo uppteknir við að fylgjast með súluritinu og hvort peningarnir þeirra eru á leiðinni upp eða niður á við. Allskonar brjálæði er í gangi. Forstjórum fyrirtækja er jafnvel boðinn starfslokasamningur og maður hefur heyrt um að þeir hafi fengið hundrað milljónir fyrir  að hætta störfum. Þetta á maður eins og ég, sem fæddur er inn í heimskreppuna miklu 1930, erfitt með að skilja,  hvernig svona greiðsla er látin viðgangast. Þetta er dónaskapur við hinn almenna borgara í landinu. Það er talað um að íslenska krónan sé lélegur gjaldmiðill en af hverju lætur krónan svona? Það er einfaldlega vegna óráðsíu fólksins í landinu. Með því að taka upp evruna er þetta land búið að missa sjálfstæði sitt og þá er þessi perla í norðurhöfum auðveld bráð.                                                             

                                                                                                 Sverrir Gíslason Hábæ; 851 Hella

Athugasemdir

[Jakob Kristinsson, 2.4.2008 kl. 18:01]

Forstjórar hafa ekki aðeins gengið stórar upphæðir í starfslokasamninga og ef við tökum dæmi um Glitnir hf.  Þá fékk Bjarni Ármannsson um 900 milljónir fyrir það eitt að láta af störfum og svo var ráðinn nýr forstjóri Lárus Welding og hann fékk 300 milljónir bara fyrnir það eitt að hefja störf.  Þannig að forstjóraskiptin í Glitnir hf. kostuðu bankann 1,2 milljarða og hver ætli þurfi síðan að borga reikninginn.  Það eru auðvitað viðskiptavinir bankans.  Vandamálið með krónuna er vegna þess að okkar gjaldmiðill er tvískiptur.  Við erum með verðtryggðakrónu og líka óverðtryggða.  Þetta getur engin þjóð leyft sér.  Því er best að segja skilið við alla vitleysuna á Íslandi og leyfa því rugli að halda áfram og einbeita okkur að stofnun fríríkisins Vestfirðir.

[Ásthildur Cesil Þórðardóttir, 3.4.2008 kl. 00:47]

Góður pistill.  Áfram Vestfirðir.

[Þórarinn Þ Gíslason (IP-tala skráð) 3.4.2008 kl. 05:13]

Góður pistill segi ég

 og einlæglega er ég með í þessu frábæra BBV.

[Aida., 8.4.2008 kl. 21:20]

Svo sammála.